Ironchip eta Opencloud Factory-ren arteko aliantza estrategikoa

2021eko azaroaren 17an, Ironchip-ek eta Open Cloud Factory-k aliantza estrategiko bakarra sinatu zuten, zibersegurtasuneko Europako merkatuaren defizita murrizteko helburu komunarekin. Segurtasunean espezializatutako eta euskal teknologia-fabrikatzaileak diren bi enpresa horiek startup gisa hasi ziren gure ekosisteman, eta SPRI Taldeak garatutako Bind 4.0 startupak azeleratzeko programan parte hartu dute. Elkarrekin, eraldaketa digitalaren parametro aldakorretara hobeto egokitzen diren segurtasun-irtenbideak bilatuko dituzte.

Ironchip-ek erronka eta aukera berrietan parte hartzeko ekimena darama bere DNAn, eta argi dute teknologia negozio-gaitzailea dela eta ez oztopo. Open Cloud Factoryri dagokionez, Europa-mailan zibersegurtasun-konponbideak sortzen dituen enpresa bat da, eta bere helburu nagusia da konpainien sarearen segurtasuna handitzea, IT/OT ikuspegi holistikoarekin.

Aliantza teknologiko berri hori zehaztasun-urrats berri bat da bi konpainientzat, eta horien fruituak aurten islatuko dira. Bertan argi eta garbi ikusi ahal izango dira bi enpresen batasunak konpainien segurtasun-estrategiari dakarzkion onurak.

Albert Estrada, CEO eta Open Cloud Factory-ren fundatzaileak dioenaren arabera, "Aukera berrietara irekitzea gure DNAren parte da, eta segurtasun-hornitzaileentzako betebeharra da teknologia gaitzaile komertzial bihurtzea, eta ez beste oztopo bat bidean. Pentsamolde horrek diseinuan egon behar du, eta, zehazki, alderdien baturak konpontzen duen arazoa argi eta garbi erakusten duten eszenatokiak bilatu behar ditugu", dio Albert-ek. "Benetan uste dugu Ironchip-ekin dugun aliantzan aurkitu dugula, merkatu organikoaren eskaritik sortu dena. Hala ere, benetako gakoa exekuzioa da, eta Ironchip-ekiko aliantza hori bezero berriei eta lehendik daudenei helaraztea espero dugu".

Bestalde, Julen Martínez Ironchip-eko CEOak honako hau gehitu du: "Une honetan, segurtasun-arrakalek enpresa askoren funtzionamendu egokia kolokan jartzen ari dira. Argi dago sistema kritikoenen eguneroko erabileran balioa gehitzearen eta egonkortasun handiagoa ematearen aldeko apustua egin behar dela. Open Cloud Factory-rekiko aliantza horrekin, zalantzarik gabe, enpresen kulturan zibersegurtasuna erraz eta eraginkortasunez txertatzeko helburu hori aurkitu dugu, lehendik dauden arazoei konponbidea emanez”.

BCSCtik irmoki sinesten dugu enpresen arteko lankidetzan eta sareko lanean, ezinbestekoa baita zibersegurtasunaren alorrean aurrera egiten jarraitzeko, are gehiago gaur egun, teknologiaren aurrerapen azkarrarekin eta mehatxu eta babes-behar berrien agerpenarekin. Argi daukagu haien aliantza aurrerapauso bat izango dela bi enpresentzat eta gure ekosistemarentzat.