Adwarea software mota bat da eta helburua da erabiltzaileak gailu batean nahi ez duen eta kontrolatu ezin duen publizitatea ikustea. Lortzeko, ausaz bidal ditzake iragarkiak, adwarearengatik ez balitz ikusiko ez genituzkeen publizitateko webguneetara bideratuz bisitak, edo erabiltzailearen nabigazioaren informazioa ere jaso dezake, jasotzen duen publizitatea pertsonalizatu ahal izateko.
Gailuan instalatutako softwarea izan arren, ez da ohiko moduan agertzen gainerako programak bezala, gailuan instalatutako aplikazioen zerrendan erraz aurki baitaitezke. Erabiltzaileak kontzienteki eta baimenduta instalatu ez duelako gertatzen da hori.
Adware bat instalatzeko ohiko bitartekoak doako programak edo probazko programak dira, erabiltzeko denbora mugatua edo sharewarea dutenak. Zuzenean onurarik sortzen ez dutenez, software horiek adwarea dute finantzatzeko alternatiba gisa. Erabiltzaileak inplizituki onartzen duenez adwarea bere gailuan instalatzea, ez litzateke malwarea izango, sor ditzakeen kalteak gorabehera. Horregatik, antibirusek ez dute beti mehatxu gisa hautematen. Beraz, komenigarria da eskuragarri dauden softwareen erabilerarekin zuhur jokatzea, ez badugu nahi desio ez dugun adware bat gure gailuetan instala dadin.
Adwarea ezkutuan instalatzeko beste taktika bat aurretik infektatu dituzten webguneen bitartez da.
Gailu batean adware bat instalatuta egon daitekeen hautemateko seinaleetako batzuk dira hauek:
- Bereziki mantso funtzionatzea edo nabigatzailea blokeatzea.
- Webguneetan bannerrak eta/edo iragarkiak agertzea, lehenago agertzen ez baziren.
- Hasiera-orria desberdin ageri bada eta ezin bada aldatu.
- Webgune batera sartzerakoan, beste batera bideratzen bazaitu.
- Nabigatzailean ikono edo luzapen berriak agertzen badira.
- Bat-batean iragarkiak zabaltzen badira.
- Baimenik gabe instalatutako aplikazioak baldin badaude.
Ohiko adwareen kasuetako batzuk dira:
- Fireball: Hasierako orria bilatzaile faltsu bategatik (Trotux) ordezkatzen du eta iragarkiak txertatzen ditu irekitzen den webgune bakoitzean. Are okerrago, nabigatzailearen konfigurazioa aldatzea galarazten du.
- Appearch: Doako beste software baten barruan txertatuta etortzen da, nabigatzailea bahitu ohi du, eta nabigatzaileak ohi bezala funtzionatzea zailtzen duten iragarki mordoa erakusten ditu.
- DollarRevenue: Kaltetutako ordenagailuan tresna-barra instalatzen du, Interneteko bilaketak arakatzeko. Iragarki iruzurtiak ere erakusten ditu, bai web-orrian bai zabaltzen diren leihoetan.
- Gator: Doako programetan eta oso ezagunetan instalatzen da, esaterako, Kazaan. Webguneetako publizitatea ezabatzen du, erabiltzaileek nahi dituztenengatik ordeztu eta irabaziak lortzeko. Erabiltzaileen nabigazio-historia jasotzen du, publizitate pertsonalizatua eskaini eta kreditu-txartelen zenbakiak lortzeko.
- DeskAd: Nabigatzailearen barruan iragarki iruzurtiak erakusten ditu eta trafikoa webgune susmagarrietara bideratzen du, iragarkiak bidaltzeko. Instalazioaren hasieran ez da nabarmentzen, baina pixkanaka kontrola hartuz joaten da, ekipo osoa hartu arte. Arazoa konpontzeko sistema eragilea berrinstalatu behar da.
