Sistemen kudeatzailea edo informazio-teknologien zuzendaria da. CIO hitza Chief Information Officer ingelesezko laburduratik dator. Askotan Teknologietako Zuzendari esaten zaio edo, ingelesez, Information Technology Director. CIOak CEOri (Chief Executive Officer) egiten dio errendapena, eta erakundearen estrategiak informazioaren teknologiarekin lerrokatuta egoteaz arduratzen da, planifikatutako helburuak lortzeko. Baina enpresa bakoitzean haien funtzioak alda daitezke.
Enpresetan teknologia gero eta gehiago ezarri denez, CIO kargu exekutibo garrantzitsuenen artean dago gaur egun; izan ere, konpainiaren prozesu teknologiko guztietan erantzukizunik handiena berak du. Bere rola beti garrantzitsua izan den arren, lehen sail bateko teknikari edo arduradun izatetik hurbilago zegoen. Hala ere, digitalizazioaren eta enpresen hazkunderako eta emaitzetarako teknologiaren beharraren ondorioz, kargu horrek bilakaera izan du azken urteotan, eta protagonismo handia hartu du maila exekutiboan.
Oro har, erabakiak hartzeko botere handia duten enpresetako goi-karguekin egiten diren bileretako kide izaten da CIO. Bere eginbeharra da estrategia teknologikoari eta teknologia onenaren ezarpenari erantzutea, negozioaren emaitzen kontua eta gastuak ahaztu gabe.
Kasu gehienetan, kargu horrek bere denboraren zati handi bat berrikuntza sustatzeari eta zuzendaritzarekin elkartzeari eta konbentzitzeari eskaintzen dio, teknologia berriek epe labur eta luzera ekar diezazkioketen onurei buruz. Horretarako, xehetasunez ezagutu behar ditu egungo teknologiak. Bezeroei eta enpresari egokitutako estrategiarik onenak eta produktu eta konponbide teknologiko onenak aukeratu behar ditu, eta, era berean, etekin handiena lortzeko pixkanaka nola inplementatu jakin behar du. Beraz, bokazio berritzailea izatea funtsezkoa da kargu hori betetzeko.
Enpresan lehendik dauden baliabideak optimizatu eta ahal den guztietan gastuak murrizten jakin behar du, prozesu zaharkituak eta errendimendu baxukoak identifikatuz eta teknologia berriekin ordeztuz. CIOk hobetu egin behar ditu erakundearen informazio-teknologien prozesuak, negozioaren arriskua eta jarraitutasuna kudeatu, informazio-teknologien azpiegituren kostua kontrolatu eta informazio-teknologien gobernua eskakizun teknologikoekin lerrokatu behar du.
CIO batek gehien sustatzen dituen teknologiak adimenarekin, analitikarekin, autozerbitzuarekin, zerbitzu-arkitekturarekin, sare sozialekin eta antzekoekin dute zerikusia. Horrez gainera, CIO batek enpresan dagoen teknologiako talentua ere behar bezala kudeatu behar du, ezagutzak transmititu eta profesionalak berrikuntzaren inguruan trebatuz.
