Zoombombing-a da bideokonferentzia batean edo bilera birtual batean nahi ez den intrusioa, normalean trolek egiten dutena.
Bideodeia, bideokonferentzia, bilera birtuala edo webinar-a hitzak, besteak beste, asko zabaldu dira COVID-19aren pandemiaren ondorioz, telelanaren gorakada dela-eta. Zoom, Google Meet edo Microsoft Teams bezalako tresnak gure errutina pertsonal eta profesionaletan guztiz txertatuta daude, bai eta zibergaizkileenetan ere.
Baina... esan dezakegu horrelako bilerak seguruak direla? Teknologia berriak edo konektatzeko modu berriak sortzen direnean, zibergaizkileek interferitzeko, erasotzeko eta onurak lortzeko moduak bilatzen dituzte. Bideodeiekin ere hori bera gertatzen da: erabiltzaileen datuak lapurtzeko –edo, behinik behin, haiek gogait eragiteko– beste aukera bat gehiago da topaketa birtuala.
Agertoki horrek zibererasoen helburu bihurtu ditu bideokonferentzia-plataformak eta -aplikazioak. Ezagunenetako bati zoombombing esate zaio: bideodei batean edo bilera birtual batean baimenik ez duten hirugarren pertsonen nahi gabeko parte-hartzea da. Izen hori duen arren, zoombombing-a ez da Zoom programaren eraso esklusiboa. Antzeko edozein plataformatan gerta daiteke.
Era horretako erasoen adibide bat Brasilen gertatu zen 2020aren erdialdean: 60 parte-hartzaileko COVID-19ari buruzko prentsa-bideokonferentzia bat hasi eta 50 minutura eraso zuten. Pantaila osoaren modua aktibatu zen, umeen oihuak entzuten hasi ziren audio-kanaletan, eta Adolf Hitler-en eta nazien agurrak zituzten bideo laburren irudiak agertu ziren.
Zoom-ek jaietan lan egiten duten pertsonekin alderatu ditu zoombomber-ak, baina oso serio hartu ditu erasoak, eta erabiltzaileei eskatu die neurriak hartzeko: aplikazioa biltegi edo hornitzaile ofizialetatik bakarrik instalatzea; aplikazioa beti eguneratua mantentzea; bileran sartzeko pasahitz sendoa sortzea; anfitrioia eta itxarongela gaitzea; sarbidea gonbidatutako erabiltzaileei mugatzea eta ezezagunak ez onartzea; estekak modu seguruan partekatzea; elementu susmagarrietan klik ez egitea edo halakorik deskargatzea; bideoa eta audioa modu lehenetsian itzalita edukitzea; eta informazio konfidentziala pantailan ez erakustea.
Komunikazio birtualeko plataformetan, hala nola Zoom edo Microsoft Teams-en, edozein hanka-sartze oso garesti atera dakioke erabiltzaileari. Urrunago joan gabe, Boris Johnson lehen ministro britainiarrak gobernu britainiarren bilera baten Zoom-en pantaila-argazkia txiokatu zuen. Elkarrizketaren kodea eta parte-hartzaile guztien erabiltzailea argi ikusten ziren irudian.
