Nola zeharkatu zituen mugak Enigmedia Opscura bihurtu zen arte

Ideia on bat izatea bezain garrantzitsua da une egokian aukera eta ikuspegi egokia izatea. Enigmedia gure euskal ekosistemako startupetako bat da, eta iraunkortasunean oinarrituta altuenera heldu daitekeela erakutsi digu.

Orain, hamarkada bat baino gehiago iraun ondoren, Enigmedia Opscura bihurtu da eta AEBra salto egitea lortu du Silicon Valley-n bulego berria irekiz. Lehenengo finantziazio-txandan 9,4 milioi dolar lortu ondoren, proiektua eta marka berria aurkeztu dute. Atzera begiratuz, Enigmedia Donostian sortutako enpresa gazte hori gogora ekarri nahi dizuegu. Bertan ingeniari-talde txiki baten adiskidetasuna nabarmantzen zen eta Kaosaren teoriari buruzko doktore-tesian egiten zuten lan.

Gertaera garrantzitsu horretara iritsi arte, komunikazio-sistemak zifratzeko kriptografiari algoritmo bat aplikatzean oinarritutako proiektu horrek eboluzionatu egin du, eta produktua merkatuaren beharretara eta eskakizunetara egokitu du. Gaur arte, industria-sektoreko proiektuetan murgilduta egon dira, hala nola Schneider Electric-en. Euren ibilbidean zehar, Startupei laguntzeko hainbat programatatik igaro dira beharrezko finantzaketa lortzeko, adibide bat jartzearren: SPRIren BIND 4.0 programa. Ahalegin komertzialean ere, ICEXen laguntzarekin, LATAMeko hainbat merkatutan ezagutarazi dira, hala nola Kolonbian eta Mexikon, eta, aspalditik egon dira hainbat azoka, konbentzio eta saritan mundu osoan zehar. Azpimarratzekoa da San Frantziskoko RSA Conference, munduko zibersegurtasun-azokarik handiena, eta BCSCko gure taldeak lagundu zien 2019ko edizioan.

Opscura berriak sendotu egingo du bere partnerren sarea (gaur egun Telefónica dago tartean) eta bezero berriak Estatu Batuetako zibersegurtasun industrialaren eta azpiegitura kritikoen alorrean. Gerard Vidal eta Carlos Tomás, Enigmediaren sortzaileetako bat, teknologia-zuzendaria eta ingeniaritza-rolen presidenteordea dira, hurrenez hurren; David Hatchel zuzendari estatubatuarra, berriz, kontseilari delegatua izango da, Crowdstrikeko IoT zuzendaria izan ondoren.