Segurtasun informatikoaren arloan, baimendutako gizabanakoek fidagarritasuna eta informaziorako sarbidea ziurtatzeko duten gaitasuna da.
Eskuragarritasuna, normalean, aldi jakin batean –normalean urtebetean– sistema batengandik zenbat jarduera-denbora espero den adierazten duen ehunekoa da. Adibidez, % 100eko balio batek adieraziko luke sistemak ez duela inoiz huts egiten, eta % 99ko erabilgarritasuna bermatzen duen sistema batek ezingo lioke eskuragarri egoteari utzi eguneko 0,24 ordu baino gehiagoz (24 orduko % 1). Gaur egungo hornitzaileekin, normalean, eskuragarritasun oso altuko zerbitzuak eskaintzen dira, hainbat hamartar erabiliz irudikatzeko:
- % 99,9 = 43,8 minutu hilean; 8,76 ordu urtean
- % 99,99 = 4,38 minutu hilean; 52,6 minutu urtean
- % 99,999 = 0,44 minutu hilean; edo 5,26 minutu urtean
Hainbat arrazoi daude sistemek eskuragarri egoteari uzteko. Arrazoi horietako batzuk planifika daitezke, hala nola mantentze-lanak edo eguneratzeak egiten direnean, baina planifikatu gabeko arrazoiak ere egon daitezke, hala nola hardware- edo software-hutsegiteak, itzalaldiak edo ingurumen-hondamendiak.
Sistema informatikoek, komunikazio-sareek eta aplikazioek modu aurreikusgarrian eta efizientziaz bete behar dute beren funtzioa hala eskatzen denean. Etenaldietatik ere segurtasunez eta bizkor berreskuratu beharko lirateke, zerbitzuari kalterik ez eragiteko. Gizarteak komunikatzeko eta ohiko bizimodua egiteko informazio-sistemekin duen gero eta mendekotasun handiagoa dela-eta, beharrezkoa da erakundeek estrategiak ezartzea behar den guztietan eskuragarri egongo direla ziurtatzeko. Horretarako, erakundeek jarraipen-estrategiak zehazten eta ezartzen dituzte, behar denean informazioa eskuragarri egongo dela bermatzeko. Hona hemen eskuragarritasuna ziurtatzen saiatzeko neurri batzuk:
- Segurtasun-kopiak egitea
- Sistemen erredundantzia
- Karga-balantzea
- Linea elektrikoen eta datuen erredundantzia
- Datu-zentroen banaketa kokaleku desberdinetan
Neurrietako askotan sistema nagusiak huts eginez gero erabil daitezkeen sistemen erreplikak erabiltzen dira. Eskuragarritasun Handiaren kontzeptua sistema bateko elementuen erreplikak erabiltzean datza, zerbitzua automatikoki berrezarri ahal izateko. Demagun suebaki bat funtsezkoa dela erakunde baten sarearen funtzionamendurako. Dena delakoagatik funtzionatzeari utziko balio, sareak ez luke behar bezala funtzionatuko, eta erakundearen jarduera geratuko litzateke. Antzeko beste sistema bat egonez gero sistema nagusia erortzean jartzeko prest, erakundeak arazorik gabe jarraituko luke bere jarduerarekin.
