RSA (Rivest, Shamir eta Adleman) gako publikoko sistema kriptografiko bat da, 1977an Ron Rivest, Adi Shamir eta Leonard Adleman informatikari eta kriptografoek MITen garatua. Era horretako lehen algoritmoa izan zen. Zenbaki osoen faktorizazioa erabiltzen du, eta, aurreko gako publikoko metodoek ez bezala (Diffie eta Hellman, esate baterako), zifratzeko nahiz digitalki sinatzeko balio du.
RSAk bi zenbaki lehen biderkatzen ditu gako publiko bat sortuko duen zenbaki erdilehen bat sortzeko. Mezua deszifratzeko, erdilehena sortzeko erabili diren bi zenbaki lehenak zehaztu beharko lituzke. Zenbaki lehen handiekin oso konplexua da, eta denbora asko behar da bi zenbaki horiek zehazteko.
Algoritmo horren segurtasuna zenbaki osoen faktorizazioan oinarritzen da nagusiki. Zenbakizko adierazpide bat erabiltzen da bidalitako mezuetarako, eta funtzionamenduak ausaz hautatutako eta une oro sekretupean mantentzen diren bi zenbaki lehen handiren biderkadura ezaguna erabiltzen du. Gaur egun, zenbaki lehen horiek 10200 ordenakoak dira, eta gero eta handiagoak dira, ordenagailuen kalkulu-ahalmena etengabe hazten ari delako.
Gako publikoko sistema guztietan bezala, erabiltzaile bakoitzak bi zifratze-gako ditu: bata publikoa eta bestea pribatua. Mezu bat bidali nahi denean, bidaltzaileak hartzailearen gako publikoa bilatzen du, mezua gako horrekin zifratzen du, eta mezu zifratua hartzaileari iristen zaionean, hura bere gako pribatua erabiliz deszifratzeaz arduratzen da. Algoritmoak lau urrats ditu: gakoak sortzea, gakoak banatzea, zifratzea eta deszifratzea.
RSA deszifratzea beste kriptosistema simetriko batzuk baino askoz motelagoa da, prozesatzeko gaitasun handiagoa behar baitu beste algoritmo-mota batzuek baino. Mezu zabal bat zifratzea posible den arren, pasahitz labur samarretarako erabili ohi da, eta mezu luzeagoak algoritmo simetrikoekin zifratzeko. RSA erabili ohi da kriptografia simetrikoko gako partekatuak transmititzeko.
Uste da RSA segurua izango dela zenbaki handi bat zenbaki lehenen biderkaduretan deskonposatzeko modu azkarrak asmatzen ez diren bitartean. Uste da konputazio kuantikoak faktorizazio-arazoari irtenbide bat eman diezaiokeela, baina zenbait ikertzailek ez dute uste aurrerapen horiek zaharkituta utziko dituztenik algoritmo horiek. Halakoak deszifratzeko kalkulu-gaitasuna handitzeaz gain, erabilitako zenbaki lehenen ordena handitzeko ere balio izango du.
